Contoh Pawartos

PAWARTOS NGAYOGYAKARTA

Dinten                         : Kemis, 18 Februari 2010

Tabuh                         : 19.30 WIB

Pambyawara               : Margono Widya Pranaswara

Stasiun televisi             : Jogja TV

Pawartos I

Topik : Panen raya pantun wonten ing Bulak Kuthon, Tegal Tirta,    Berbah, Sleman.

Kelompok tani makmur Dusun Kuthon, Desa Tegal Tirta, Berbah, Sleman dinten Kemis enjing ngadani panen raya pantun ing bulak Kuthon. Ing pasabinan ingkang wiyaripun 25 hektar menika panen raya semangke saged ngasilaken gabah pantun ciherang kathahipun 10,4 ton ing saben hektaripun. Asil menika kapetang kathah tinimbang ing papan sanes ingkang racak naming pikantuk 8 ton ngantos 9 ton ing saben hektaripun. Sinaosa nemahi pepalang babagan kacekapaning toya nanging asil panenipun kelompok tani makmur taksih langkung inggil. Haryadi Jogja TV.

Pawartos II

Topik : Pengetan Rebo Abu wonten ing Greja Stasi Pengging, Paroki,    Klaten.

Ing dinten Rebo kala wingi, umat Katholik sak ndonyo nggelar upacara Misa Rabu Abu kangge ngenget – enget lampah lan kasangsaranipun Yesus Kristus sak derengipun jumeneng ing dinten Paskah. Saklebeting wanci Pra Paskahpunika umat Katholik dipun ajak mesuraga kanthi siam lan nyenyirik kanthi mbangun gesang sak sampunipun mertobat. Misa Rabu Abu ingkang dipun adani ing Greja Stasi Penggeng Paroki Klaten. Ingkang dipun pandhegani dening Rama Yustinus Agus Purwadi, Pr. Ing sesorahipun Rama Agus ngajak dhateng umat Katholik supadhos pasrah sumarah dumateng ngersaning Pangeran awit namung Gusti ingkang dados tuk sumber kekiyatan sarta nglebur sedaya dosa titahipun. Kanthi lampahing siam lan nyenyirik saklebeting Pra Paskah menika mligipun ing Rebo Abu lan Jum’at Agung umat Katholik kaajab sami mertobat dumateng maneko krida kerohanian, kadosta rekoleksi, retret, jalan salib, lan medhitasi minangka tandha bilih umat Katholik sanpun ngancik wanci Pra Paskah ing palarapanipun umat ingkang dhateng dipun sukani tandha salib saking awu ron palem ingkang sampun dipun besem minggu kepengker. Awu ngawujudaken lambang manungsa ingkang cinipta dening greget pertobatan. Haryadi Jogja TV.

Pawartos III

Topik : Lulusan SMKN I Sewon, Bantul siaga ambyur ing jagading   pakaryan

Arto anggaran kangge wragat ujian nasional saking pemerintah pusat dipun sudo ngantos 1,1 milyar nanging lampahing ujian nasional ing maneko sekolah kejuruan tetep lumampah rancak, salah satunggalipun wonten ing Sekolah Menengah Kejuruan Negri I Sewon wiwit  dinten Senen tetep ngawontenaken uji kompetensi kangge siswo kelas XII. Wiwit dinten Senen kala wingi ing SMKN I Sewon, Bantul nggelar ujian kompetensi  siswa kelas XII. 376 siswa saking sekawan jurusan tumut uji konpetensi laras kalian bidang keahliyanipun piyambak – piyambak, sakmangke ing SMKN I Sewon wonten sekawan bidang keahlian inggih menika bidang akomodasi perhotelan, restoran dan tata boga, tata busana, sarto tata kecantikan. Sak derengipun tumut ujian akhir nasional ingkang asipat teori, siswa kelas XII dipun kedahaken tumut uji kompetensi ingkang dipun awasi dening Asesor saking sak njawinipun sekolah. Kepala SMKN I Sewon, Sukarman mratelaken pihakipun tansah sidiyo supados lulusanipun saged nggadahi keahlian ingkang selaras kalian bidang profesinipun. Awit saking menika lulusan SMK Negri I Sewon dipun kulinaaken ambyur ing jagding pakariyan menapa dene wiraswasta kanthi mandiri. Anang Zainudin Jogja TV.

Pawartos IV

Topik : Kasarasan mujudaken kawigaten ingkang wigatos.

            Kasarasan mujudaken patinggen wigatos, nanging asring awiting antawisipun wragad njalari masyarakat miskin kangelan nampi ladosan kasarasan kanthi murwat. Awit saking menika wontenipun krida sosial kadosto usada layanan kangge masyarakat miskin dipun betahaken sanget. Yuni Satya Rahayu ingkang mujudaken bakal calon wakil bupati pasangan Sri Purnomo salebeting krida usada lelayanan kalian warga ing Bale Desa Argo Mulyo Kecamatan Cangkringan Sleman mratelaaken kasarasan mujudaken bab ingkang langkung wigatos. Nanging masyarakat miskin asring nemahi pepalang babagan wragat kangge kasarasan. Kamongko sakmangke Pemerintah Kabupaten Sleman saweg nggrengsengaken sesanti tumuju Sleman sehat. Awit saking punika Yuni Satya nggadahi tekat nggrengsengaken sistim penanganan kesehatan ing Kabupaten Sleman. Wetawisipun wekdal lelahanan menika sinengkuyung pihak antawisipun lembaga sosial Pemerintah Desa Argo Mulyo, Puskesmas Cangkringan lan Polsek Cangkringan. Mligi saking Puskesmas Cangkringan ngaryakaken enem tenaga medis kangge ngladosi masyarakat ingkang dhateng mresakaken kasarasanipun. Krida punika ugi dipun estreni dening pelawak Srimulat Polo.  Heri Susanto Jogja TV.

Pawartos V

Topik : Pengetan Ambalwarsa kaping 265 tahun Kitha Surakarta.

            Ewon warga Surakarta Jawa Tengah dinten Rebo sonten ketingal ngebaki Jl. Slamet Riyadi Surakarta, kangge ningali lampahing kirab Boyong Kedhaton puncaking pengetan ambalwarsa kaping 265 tahun Kitha Surakarta. Kirab menika dipun gelar kangge nggegegi lampahing seni lan budaya daerah ingkeng samangke saya kakikis. Kirab Boyong Kedhaton menika nggelar maneka daya kadasta seni budaya ingkang dados unggulanipun Kitha Surakarta. Kirab kawiwitan saking lapangan kota barat langkung Jl. Slamet Riyadi, Pasar Sriwedari ingkang dipun pungkasi wonten Bale Kota. Para pasarta kirab ingkang ngangge maneka busana tradisional daerahipun piyambak – piyambak ngregengaken lampahe kirab. Kirab Boyong Kedhaton mujudaken puncaking pahargyan pengetan ambal warsanipun Kitha Surakarta ingkang kaping 265 tahun. Kirab menika nggambaraken boyongipun jejering Kraton Mataram saking Kartasura dhateng Surakarta. Ing wekdal sak mangke dening Pemkot Surakarta manika krida ageng dipun gesangaken malih kejawi kangge narik krentekipun wisatawan dhateng Surakarta ugi kangge ngicali panganggep awon bab Kitha Surakarta. Krida menika badhe tansah dipun digelar dening pemerintah pusat Surakarta minangka agenda taunan lan minangka sarana kangge ngawontenaken budaya lokal. Palaporan saking Surakarta Jaawa Tengah. Abdullah Faqih Jogja TV.

Pawartos VI

Topik : Pameran pusaka Kraton Ngayogyakarta Hadiningrat.

            Manika barang pusaka kagungan dalem Kraton Ngayogyakarta lan Pura Pakualaman dipun gelar wonten ing pagelaran Kraton Ngayogyakarta Hadiningrat wiwit tanggal 16 – 25 Februari 2010. Adicara pameran barang pusaka menika dipun gelar minangka rerangkaining mahargya sekaten.

PITUTUR   :

“MIKUL DHUWUR MENDHEM JERO”

Dharmaning putra, mring yayah rena,

prayogi tansah nuladha lampah utama angreksa luhuring wibawa, kanthi sarana tumindhak tumandhuk ingkeng  susila anuraga.

Jangkebing andharan menika sumangga kita semak saklebeting pitutur cuplikan saking pangandikanipun Begawan Abiyasa dumateng wayahipun Raden Janaka :

“Mangkene yo ngger, senajanto wiwit cilik kowe wis ditinggal deneng sudarmamu prayoga kowe ki teteb kudu bekti marang wong atuwamu”. Ujaring para winasis kudu bisa mikul dhuwur mendhem jero. Tegese wajibe putra kudu njunjung kaluhurane wong tuwa nuladha laku utama lan pakarti becik kang nate ditindakake wong tuwa. Bakal luwih prayoga menawa gelem nglestarekake. Kejaba saka iku, kabeh pakarti ala kekurangan lan kacingkrangan kang disandang marang wong tuwamu prayoga katutupana. Cukupa sinimpen tlenging kalbu menepna sak jroneng nala. Kang tundhane bisa dadia kaca benggala sak jrongneng njangkah panjangka lan ngranggeh gegayuhan kang kaidam – idamake marang sedyamu.